Rreth nesh

Arbëreshët e Italisë jo vetëm që ruajtën ndër shekuj identitetin e tyre, por dhanë një kontribut të jashtëzakonshëm në të gjitha periudhat historike, sidomos nga koha e Rilindjes sonë Kombëtare e deri te lufta e fundit, kur populli shqiptar i Kosovës u ballafaqua me zbatimin e gjenocidit të Serbisë.

Në shenjë mirënjohjeje ndaj kontributit të madh të arbëreshëve, shoqata “Hora e Skënderbeut”, e themeluar nga mërgimtarët shqiptarë më 10 shtator 2023 në Zvicër, ndërmori nismën, që Bashkisë Hora e Arbëreshëvet në Sicili të Italisë t’i dhurojë një shtatore madhështore të Gjergj Kastriotit Skënderbeut.

Shtatorja mbi tre metra e lartë, e punuar me mjeshtëri nga skulptori Gëzim Muriqi, na sjell Heroin tonë Kombëtar, Gjergj Kastriotin Skënderbeun, në gjendje gatishmërie, mbi shkëmbin e atdheut që bart plagët e përpjekjeve armiqësore për ta copëtuar, dhe të palëkundur përballë furtunave të kohës, gjë që e pasqyrojnë palat e pelerinës. Ndërkaq, vështrimi i tij depërtues ua bën të qartë egërsirave që vijnë të maskuara me lëkurë qengji, se do të ballafaqohen me atë, që në supe mban lëkurën e ujkut!

Realizimi i këtij projekti do të bëhet me mbështetjen financiare të mërgimtarëve.

Krahas mirënjohjes që shprehim ndaj arbëreshëve të Italisë, dhurimi i shtatores së Gjergj Kastriotit, që përbën shtyllën kryesore të identitetit tonë kombëtar, do t’i japë një shtytje të re kultivimit të mëtejmë të lidhjeve tona, kudo qofshim në botë!