Shoqata “Hora e Skënderbeut” i bashkëngjitet thirrjes së Qendrës “Gjenocidi në Kosovë – Plagë e Hapur” që më 15 janar, në ditën e përkujtimit të viktimave të gjenocidit në Kosovë të ndezim një qiri në shenjë nderimi për ta.

Ftojmë anëtarët dhe mbështetësit e shoqatës sonë, që më 15 janar, në ora 19:30, të ndezin nga një qiri në dritaret apo ballkonet e tyre. Kështu ne ndajmë një moment nga përditshmëria jonë për tu bërë bashkë me të gjitha ato viktima të këtij gjenocidi.

Ftojmë edhe shoqatat tjera kulturore, ansamblet e klubet kudo që veprojnë, të marrin iniciativën dhe në përputhje me kushtet që ato kanë, të bëjnë shënimin e kësaj date të rëndësishme në formës sa më të dinjitetshme.

Ne duhet të përçojmë mesazhin gjithandej se ne nuk harrojmë të kaluarën tonë, sidomos pjesën e saj më tragjike për të cilën akoma drejtësia nuk e ka thënë fjalën e saj.

As tani kur ne kemi hyrë në çerekshekullin e dytë të këtij gjenocidi, akoma nuk është arritur drejtësia për mbi dhjetëmijë civilë shqiptarë të vrarë, për njëzetmijë shqiptarë të përdhunuar, për dëbimin e shumicës së shqiptarëve nga Kosova si dhe për shkatërrimin e e objekteve të trashëgimisë kulturore shqiptare.

Ngritja e zërit për këtë tragjedi është një obligim kombëtar për të gjithë shqiptarët.

Duke kujtuar gjenocidin ne do të sensibilizojmë opinionin vendas e ndërkombëtar për domosdoshmërinë e arritjes së drejtësisë. Tragjedia që kanë përjetuar shqiptarët e Kosovës gjatë luftës së fundit më 1998-1999 nuk duhet të përsëritet më asnjëherë dhe shteti serb duhet të marrë dënimin e merituar nga drejtësia ndërkombëtare, për planifikimin dhe zbatimin e këtij gjenocidi.

NE NUK HARROJMË!

KURRË MË GJENOCID!

Zürich, 8 janar 2025

Kryesia e shoqatës “Hora e Skënderbeut”

#nenukharrojme