Sot është ditëlindja e Gjergj Kastriotit Skënderbeut. Pikërisht më 6 maj të vitit 1405 lindi Gjergji, ai i cili u bë yll i përjetshëm që ndriçon në hapësirën e trojeve tona dhe rrezaton edhe në gjithë botën. U bë frymëzuesi kryesor i përpjekjeve shekullore për çlirim nga pushtuesit duke qenë njëkohësisht edhe simbol i bashkimit.

Shoqata Hora e Skënderbeut është e lumtur që Gjergj Kastrioti Skënderbeu nderohet gjithnjë e më shumë. Ne e shënojmë këtë datë me gëzim dhe ftojmë të gjithë shqiptarët që në mënyrë sa më madhështore të festojnë ditëlindjen e krye-heroit tonë kombëtar.

Siç është i njoftuar opinioni, shoqata “Hora e Skënderbeut” ka marrë iniciativën që shtatorja e Skënderbeut, vepër e skulptorit të shquar Gëzim Muriqi, të vendoset në qytetin arbëresh Hora e Arbëreshëvet në Sicili. Kjo do të bëhet më 30 gusht të këtij viti, në ditën e themelimit të qytetit, dhe është dhuratë e mërgimtarëve shqiptar për arbëreshët, në shenjë mirënjohje për kontributin e tyre në ruajtjen e gjuhës, kulturës e identitetit arbëror më shumë se pesë shekuj.