Kjo ngjarje kulturore, e zhvilluar mbrëmë në Krienz të Lucernit, që tuboi 16 grupe dhe ansamble muzikore, me qëllim të grumbullimit të mjeteve për ngritjen e shtatores së Kryetrimit tonë te Hora e Arbëreshëve, pos që ishte një sfidë jo e lehtë për organizatorin, dëshmoi edhe njëherë se sa e madhe është skena jonë kulturore në shtetin helvetik.

Teksti dhe fotot: Rexhep Rifati

Manifestimi i mbrëmshëm kulturor në Lucern të Zvicrës me moton “Hora e Skënderbeut”, ndonëse pati një përgatitje më pak se dy mujore, megjithatë u tregua shumë i suksesshëm, në rend të parë sepse tuboi pas një kohe të gjatë thuaja se shumicën e grupeve, shoqatave dhe ansambleve artistike, por edhe një pjesëmarrje tejet masive të mërgimtarëve tanë nga anë të ndryshme të Zvicrës por edhe shteteve fqinje, siç janë Gjermania e Austria.

Organizatori, Shoqata “Hora e Skënderbeut”, duke dashur tua plotësojë dëshirën për pjesëmarrje thuaja të gjitha grupeve, ndonëse solli në skenë një vlerë që duhet çmuar përplot kolorit, që i jepte ambientit një ngjyrim të një spektakli, pak sa u stërgjatë, por qenësore ishte se shumica e pjesëmarrësve u ndanë të kënaqur .

Por me pak fjalë ti kthehemi rrjedhave të programit që objektiv kishte ngritjen shtatores së Heroit Kombëtar me kontribute të mërgimtarëve tanë, pas antonimit të Himnit kombëtar, u udhëhiqet nga moderatorët Yllka Zuzaku dhe Ramadan Morina i cili edhe është kryetar i shoqatës “Hora e Skënderbeut”.

Në mesin e mysafirëve ishin ambasadori i Shqipërisë Mustafa Nano, i cili edhe mbajti një fjalë respektive për këtë akt fisnik të mërgimtarëve tanë, si dhe konsulli i Kosovës në Cyrih, Vigan Berisha, ndërsa nga Kosova kishte udhëtuar edhe skulptori Gëzim Muriqi, i cili nënvizoi se tash skulptura është në procesin e futjes në bronz.

Me fjalë rasti u paraqitën sekretari i shoqatës “Hora e Skënderbeut” Adnan Asllani i cili u përqendrua te rrjedha e aksionit që nga akti solidar i Veli Genc Berishës që kontribuoi që në start me 20 mijë euro për ngritjen e shtatores e deri te gatishmëria e shumë mërgimtarëve për të kontribuar deri te finalizimi i projektit, si dhe Bardhec Berisha i cili i bëri një vështrim rrugëtimit heroik të Gjergj Kastriot Skënderbeut dhe jehonës së luftërave të tije në skenën botërore.

Në skenë defiluan jo vetëm të rritur por edhe fëmijë dhe grupe që secila nga to solli një emblemë në veti duke i dhënë ngjarjes një vulë arti, por edhe dëshmie se me ç ‘entuziazëm punohet në baza thjeshtë vullnetare e amatore, pa pas asnjë lekë ndihmash financiare institucionale.

Pa i përmendur veç e veç grupet e ansamblet, nga pozita e një kronisti, por edhe në emër të njërit nga anëtarët e shoqatës “Hora e Skënderbeu”, u shprehi falënderimin gjithë pjesëmarrësve , duke ndarë me këtë rast edhe falënderimin e gjithë kryesisë së shoqatës.